काठमाडौं– सामुदायिक रेडियोको क्षमता अभिवृद्धि तथा नीति संवाद कार्यक्रममा सामुदायिक रेडियो प्रसारक संस्था (अकोराव) मा आबद्ध रेडियो सञ्चालकहरूले पछिल्लो समय सामुदायिक रेडियोहरू संकटमा रहेको भन्दै चिन्ता व्यक्त गरेका छन् ।

सोमबार र मंगलबार अकोराव बागमती प्रदेश कार्यसमितिले आयोजना गरेको कार्यक्रममा सहभागी प्रदेश भित्रका रेडियो व्यवस्थापकहरूले सामुदायिक रेडियोहरू आर्थिक संकट रहेको बताए ।

नेवा सामुदायिक एफएमका सञ्चालक कमला महर्जनले आर्थिक संकटका कारण रेडियोबाट नियमित प्रसारण हुँदै आएका कार्यक्रम तथा समाचार बन्द गर्नुपर्ने अवस्थामा पुगेको बताइन् ।

त्यसैगरी कार्यक्रम रेडियो उपत्यका सामुदायिक एफएमका श्रीराम तिवारीले पनि सामुदायिक रेडियोलाई समुदायले अपनत्व गर्न नसक्दा समेत संकटमा पर्दै गएको उल्लेख गरे ।

कार्यक्रममा आफ्नो जिज्ञासा राख्दै उनले विश्व परिवेशमा प्रविधिमा परिवर्तनले गर्दा दिएको चुनौती तथा रेडियो  प्रविधि प्रति राज्यको चासोमा कमी आउँदा सामुदायिक रेडियोहरू संकटमा परेको बताए ।

त्यसैगरी कार्यक्रममा रामेछाप जिल्लाको पहिलो सामुदायिक रेडियो हजुरको रेडियोमा कार्यरत दीपक घिमिरे सामुदायिक रेडियो व्यवस्थापकहरूले रेडियोलाई दोस्रो पेसाको रूपमा हेर्दा पनि सामुदायिक रेडियो समस्यामा परेको बताए ।

सामुदायिक रेडियोहरू समुदायसम्म पुग्न नसक्दा र समुदाय लक्षित कार्यक्रम,समाचार उत्पादनमा कमी आउनुले पनि सामुदायिक रेडियो प्रतिको माया घट्दै गएको बताए ।

रेडियोहरू  गुणस्तरमा भन्दा संख्यामा वृद्धि हुँदा सामुदायिक रेडियोले आर्थिक संकट झेल्नुपरेको अकोरावद्वारा सञ्चालित  (सिआईएन)नेटवर्कका म्यानेजर दीपक आचार्यले बताए । प्रशिक्षण कार्यक्रमको सहजीकरण गर्दै सामुदायिक रेडियोहरूले पनि समुदाय लक्षित कार्यक्रम उत्पादनमा जोड्दिन नसक्दा संकट खेपिरहेको बताए । 

रेडियो विज्ञ रघु मैनाली, सामुदायिक रेडियो प्रसारक संघका केन्द्रीय सचिव भक्त श्याङताङ, सुमन बस्नेत लगायतले सहभागीहरूलाई तालिममा प्रशिक्षण दिएको अकोराव बागमती प्रदेशका सचिव आशिष् ठकुरीले बताए ।-सुबास बस्नेत/ काठमाडौं