काठमाडौं– सत्ता साझेदार नेपाली कांग्रेसले भिजिट भिसा प्रकरण र गृहमन्त्री रमेश लेखकमाथि छानबिनका लागि समिति बनाउन इन्कार गरेको छ । प्रतिपक्षी दलहरूसँग सोमबार भएको छलफलमा कांग्रेसले छानबिन समिति गठनको प्रस्ताव इन्कार गरेको हो ।

प्रतिपक्षी राष्ट्रिय स्वतन्त्र पार्टी (रास्वपा) का कार्यवाहक प्रवक्ता मनिष झाका अनुसार बैठकमा मानव तस्करी रोक्न सर्वदलीय बिशेष समिति बनाएर अघि बढ्ने प्रस्ताव गरिएको थियो ।

तर, कांग्रेसले रास्वपाले गरेको प्रस्तावबारे आफूले चुनावी घोषणा पत्रमै लेखेको जवाफ दिएको छ । बैठक बिनानिष्कर्ष टुंगिएपछि छलफलका क्रममा रास्वपाले कांग्रेस सामु राखेको प्रस्ताव र कांग्रेसले दिएको जवाफ सामाजिक सञ्जाल एक्स (ट्विटर) मा साझा गरेका छन् ।

‘रास्वपा : सर्वदलीय विशेष समिति बनाएर यो देशमा रहेको मानव तस्करी रोकौं,’ कार्यवाहक प्रवक्ता झाले लेखेका छन्, ‘कांग्रेसः त्यो त हाम्रो चुनावी घोषणापत्रमा लेखेको नै छ नि । आउँदो निर्वाचनमा पनि लेखौँला ।’

रास्वपाका प्रमुख सचेतक सन्तोष परियारले पनि भिजिट भिसा प्रकरणमा छानबिन गर्नुपर्ने प्रतिपक्षी दलहरूको मागमा कांग्रेस सहमत नभएपछि बैठक बिनानिष्कर्ष टुंगिएको जानकारी दिए ।

उनले खबरहबसँग भने, ‘छानबिन समिति बनाउन नेपाली कांग्रेस सहमत भएन । छलफलमा केही निष्कर्ष निस्केन ।’

नयाँ बानेश्वरस्थित संघीय संसद् भवनमा सोमबार कांग्रेससँगको बैठकमा प्रमुख प्रतिपक्षी नेकपा माओवादी केन्द्र र प्रतिपक्षी रास्वपाका नेताहरू सहभागी थिए ।

आइतबार पनि बैठक सुरु हुनेबित्तिकै विपक्षी दलले अवरुद्ध गरेपछि प्रतिनिधिसभा बैठक सोमबार दिउँसो २ बजेसम्मका लागि स्थगित भएको थियो ।