काठमाडौं- नेकपा (एमाले) का अध्यक्ष केपी शर्मा ओलीले पार्टीभित्रै भ्रम फैल्याउने र फटो ल्याउने तत्वहरू रहेको बताएका छन् ।

अखिल नेपाल राष्ट्रिय स्वतन्त्र विद्यार्थी युनियनको २४ औँ राष्ट्रिय महाधिवेशनको कीर्तिपुरमा उद्घाटन गर्दै प्रधानमन्त्री ओलीले यस्तो बताएका हुन् ।

उनले भ्रम फैल्याएर अँध्यारो देखाउने प्रवृत्ति बढ्दै गएको पनि बताए । पार्टीभित्र एकता हुनु हुँदैन भनेर केही तत्व लागिरहेको पनि उनले गुनासो गरे ।

‘एमालेप्रति पनि भ्रम फैलाउने र अँध्यारो देखाउने प्रवृत्ति छन् । पार्टीभित्र एकता हुनु हुँदैन । चुनावबाटै नेतृत्व चयन गर्नुपर्छ भनेर भ्रम फैलाउन खोजेका छन्’, उनले भने,‘मेरो आग्रह के हो भने हामी एकता, फेरि एकता र सुदृढ एकतामा जान सके लक्ष्यमा प्रभावकारी रूपमा अघि बढ्न सक्छौँ । मिल्नै नसक्ने भएमा मित्रतापूर्ण निर्वाचनमा जाने अधिकार त छँदैछ ।’

उनले पार्टीभित्र झ्याम्टा बजाउँदा मात्र लोकतन्त्र हुने, सहमति नहुँदा लोकतन्त्र नहुने खालको भावनामा बग्न नहुने पनि बताएका छन् ।

‘अहिले एमालेविरुद्ध फाटो ल्याउने काम भइरहेको छ। त्यस्तो भाष्य बनाएका छन् उरन्ठेउलाहरूले, सहमति सबैभन्दा लोकतान्त्रिक विधि हो । मिलेर कार्यविभाजन गर्नु राम्रो हो’, उनले भने, ‘सहमतिका साथ गर्नुभयो भने दुईतीजना साथीहरूले अलिकति त्याग गरे संगठन बलियो बन्छ ।’

उनले चुनाव चाहनेलाई फेसबुकेले उकासेको पनि बताए । ‘चुनाव गएपछि भाइ तपाईंले हार्नु भएको छैन, चुनाव गराएर छाड्नु भयो त्यो चाहिँ जित हो भनेर फेसबुके फाटोवादी कुराको कुनै अर्थ छैन’, उनले विद्यार्थीहरूलाई भने, ‘तपाईंहरू मिलेर जानुस्, सक्दै सक्नु हुन्न, मिल्न सक्नु हु्न्न भने बाकस थाप्नुस् ।’