एजेन्सी– अमेरिकी राष्ट्रपति डोनाल्ड ट्रम्पले उत्तर कोरियासँगको सम्बन्ध थप मजबुत बनाउने बताएका छन् । उत्तर कोरियाली सर्वोच्च नेता किम जोङ उनसँग भियतनाममा हुने दोश्रो शिखर वार्ताका लागि त्यसतर्फ जाने क्रममा वाशिंटनमा बोल्दै राष्ट्रपति ट्रम्पले किमसँग ‘धेरै नै राम्रो’ सम्बन्ध विकास गर्नका लागि तयार रहेको बताएका हुन् । उनले उत्तर कोरियाले हतियार परीक्षण नगरेसम्म आफू खुशी नै रहन समेत बताएका छन् ।

उत्तर कोरियाले हतियार परीक्षण नगरेसम्म उत्तर कोरियाको आणविक निशस्त्रीकरणका लागि कुनै हतार नरहेको समेत जनाएका छन् । उत्तर कोरियाले पछिल्लो पटक सन् २०१७ को सेप्टेम्बरमा आणविक परीक्षण गरेको थियो भने सन् २०१७ कै नोभेम्बरमा अन्तरमहादेशीय ब्लालिष्टिक क्षेप्यास्त्र परीक्षण गरेको थियो । त्यसयता उत्तर कोरियाले कुनै हतियार परीक्षण गरेको छैन ।

उत्तर कोरियाली सर्वोच्च नेता किम र अमेरिकी राष्ट्रपति ट्रम्पबीच आगामी बुधबार र बिहीबार भियतनामको राजधानी हनोईमा दोश्रो शिखर वार्ता हुँदैछ । यसअघि गत वर्ष सिङ्गापुरमा भएको पहिलो शिखर वार्तामा भएका सम्झौता कार्यान्वयनका लागि ठोस कदम चाल्न नसकिएको भन्ने टिप्पणी भइरहेका बेला राष्ट्रपति ट्रम्प तथा सर्वोच्च नेता किमबीच दोश्रो चरणको शिखर वार्ता हुन लागेको हो ।

उत्तर कोरियाली सर्वोच्च नेता किम रेलमार्गबाट भियतनाम आउनका लागि हाल चीनमा रहेको बताइएको छ भने राष्ट्रपति ट्रम्प पनि भियतनामका लागि प्रस्थान गरिसकेका छन् ।