काठमाडौं– आज रूसी भाषा दिवस विश्वका विभिन्न मुलुकमा विविध कार्यक्रमका साथ मनाइँदै छ । यहाँस्थित रूसी सांस्कृतिक केन्द्रको आयोजनामा आज अपराह्न एक कार्यक्रमका साथ यो दिवस मनाइँदै छ । 

आधुनिक रूसी साहित्यका संस्थापक अलेक्ज्याण्डर सर्गेइभिच पुष्किनको २२६ औँ जयन्तीका रूपमा पनि यो दिवस मनाइन्छ । संयुक्त राष्ट्रसङ्घको विश्वव्यापी सञ्चार विभागले २०१० मा गरेको प्रयासस्वरूप त्यसयता हरेक वर्ष ६ जुनमा रूसी भाषा दिवस मनाउन थालिएको हो ।  संयुक्त राष्ट्रसङ्घमा पनि आज यो दिवस विविध कार्यक्रमका साथ मनाइने उक्त विश्व संस्थाले जनाएको छ । 

राष्ट्रसङ्घका अनुसार रूसी भाषा उक्त संस्थामा प्रयोग हुने छ वटा आधिकारिक भाषामध्येको एक हो । यो भाषा दिवसको उद्देश्य बहुभाषिकता र सांस्कृतिक विविधता मनाउनु र संस्थामा सबै छ वटा आधिकारिक भाषाको समान प्रयोगलाई प्रवर्द्धन गर्नु हो ।