काठमाडौं- नेकपा एकीकृत समाजवादी पार्टीका अध्यक्ष माधवकुमार नेपालले विशेष अदालतमा भ्रष्टाचार मुद्दा पर्दैमा आफूलाई डर नलागेको बताएका छन् ।

रौतहटबाट काठमाडौं आएलगत्तै बिहीबार साँझ पार्टीका नेता र वकिलहरूसँग परामर्श गरिसकेपछि सञ्चाकर्मीलाई प्रतिक्रिया दिँदै उनले यसो भनेका हुन् ।

अख्तियार दुरूपयोग अनुसन्धान आयोगले काभ्रेस्थित पतञ्जलिका लागि खरिद जग्गा बिक्री प्रकरणमा १८ करोड ५८ लाखको भ्रष्टाचार मुद्दा दायर गरेको पृष्ठभूमिमा गल्ती नगरेकाले डर नलागेको नेपालले बताए ।

‘एउटा मान्याता छ, मेरो ‘नबिराउनू नडराउनू’, नेपालले भने, ‘यो मुद्दा राजनीतिक प्रतिशोधका लागि यो आएको हो ।’

अध्यक्ष नेपालले आफूले कुनै भ्रष्टाचार नगरेको पनि बताए । ‘मैले भ्रष्टाचार गरेको छैन, चुनौतीका साथ भन्छु म’, उनले भने, ‘राजनीतिक प्रतिशोध गर्न, बदला लिन गरिएको निर्णयविरुद्ध राजनीतिक र कानुनी दुवै लडाइँ लड्छु ।’