सर्लाही- सशस्त्र प्रहरी बल सर्लाहीले साढे आठ लाख मूल्य बराबरको सुर्तीजन्य गुटखासहित एक थान पिकअप भ्यान नियन्त्रणमा लिएको छ ।

सशस्त्र प्रहरी बल नेपाल गण १० हेडक्वार्टर कविलासी सर्लाहीले नवलपुरबाट मलङ्गवातर्फ आउँदै गरेको ना२च ५९७८ नम्बरको पिकअप भ्यानलाई कविलासी नगरपालिका–८ अगर्वा चौकमा चेकजाँच गर्दा सुर्तीजन्य गुटखा पक्राउ गरेको हो ।

विशेष सुराकीका अधारमा प्रहरी नायब निरीक्षक प्रमोदकुमार सिंहको टोलीले गुटखा बरामद गरेको हो । बरामद गरिएको गुटखाको भ्याट बिलअनुसार मूल्य आठ लाख ३९ हजार ४४८ रुपैयाँ रहेको सशस्त्र प्रहरीले जनाएको छ ।

गुटखामा क्यान्सरको चित्र देखिने गरी तस्बिरमा ९० प्रतिशत स्वास्थ्य चेतावनी लेखिएको हुनुपर्नेमा ४० प्रतिशत मात्र स्वास्थ्यसम्बन्धी चेतावनी लेखिएको गुटखासहित पिकअप भ्यान नियन्त्रणमा लिइएको सर्लाहीका प्रजिअ मोहनबहादुर जिसीले जानकारी दिए ।