काठमाडौं– कराते वान प्रिमियर लिगमा ऐतिहासिक कांस्य पदक जितेकी नेपाली कराते खेलाडी एरिका गुरुङलाई काठमाडौंमा भव्य स्वागत गरिएको छ ।  

मोरोक्कोको रावतमा भएको लिगमा सहभागी भएर मंगलबार स्वदेश फर्किएकी कराते खेलाडी एरिकालाई त्रिभुवन विमानस्थलमा राखेप सदस्य सचिव टंकलाल घिसिङ, नेपाल कराते महासंघका अध्यक्ष युवराज लामा लगायतले स्वागत गरेका हुन् । 

बाजागाजासहित एरिकालाई करातेका खेलाडी, समर्थक, आफन्त र शुभचिन्तकले स्वागत गरेका थिए । सो क्रममा नेपाली कराते खेलाडी एरिकाले अहिले कांस्य पदक जिते पनि स्वर्ण पदक जित्ने लक्ष्यका साथ अघि बढ्ने बताइन् ।  

कराते वान प्रिमियर लिगको महिला ६८ केजीमाथि तौल समूहमा नेपालको प्रतिनिधित्व गर्दै ऐरिकाले फ्रान्सेली खेलाडी क्लेमेन्स पिएलाई ६–२ ले पराजित गरेकी थिइन् ।

एरिका विश्वकै शीर्ष ३२ खेलाडी मात्र खेल्ने लिगमा पदक जित्ने पहिलो नेपाली खेलाडी बन्न सफल भएकी छन्  ।