काठमाडौं- पूर्वराष्ट्रपति विद्यादेवी भण्डारी चीनको साताव्यापी भ्रमण सकेर सोमबार बिहान स्वदेश फर्किएकी छन्।

नेकपा एमालेका उपमहासचिव रघुवीर महासेठ, नेता कर्णबहादुर थापा र उद्योग, वाणिज्य तथा आपूर्ति मन्त्री दामोदर भण्डारीसहित १५ सदस्यीय प्रतिनिधिमण्डलको नेतृत्व गर्दै उनी अघिल्लो शनिबार राति चीन गएकी थिइन ।

चीनबाट फर्किएपछि विमानस्थलमा पूर्वराष्ट्रपति भण्डारीले आफ्नो भ्रमण राम्रो भएको छोटो प्रतिक्रिया दिएकी छन् । उनले भ्रमण राम्रो र उपलब्धिमूलक रहेको उल्लेख गरिन् ।

तर उनले चीनमा उच्चस्तरको भेटवार्ताका क्रममा नेपालका कम्यनिस्टबीच एकता र आफू नेकपा एमालेको नेतृत्वमा फर्किने विषयमा कुरा भए नभएको केही खुलाइनन् ।

भण्डारीले भ्रमणबारे विस्तृत व्याख्या एमाले नेतासमेत रहेका उद्योगमन्त्री दामोदर भण्डारीले गर्ने भन्दै विमानस्थलबाट बाहिरिइन् ।

पूर्वराष्ट्रपति बाहिरिएपछि उद्योगमन्त्री भण्डारीले यो भ्रमणमा सरकार र पार्टीको सहभागिता भएका कारणले उपलब्धिमूलक भएको सुनाए ।

‘नेपालको प्रतिनिधित्व गरेर पुगेको हाम्रो टोलीलाई चीनको फोरममा उच्च सम्मान र सद्भाव मिल्यो । यस भ्रमणलाई सद्भावपूर्ण मान्न सकिन्छ’, उनले भने, ‘आर्थिक कूटनीति र सांस्कृति सम्बन्धलाई विकसित गर्ने हिसाबले पनि यो भ्रमणको महत्व छ । टोलीलाई सम्मान पनि चिनियाँ पक्षबाट प्रदान भएको छ ।’

भण्डारीले पूर्वराष्ट्रपतिको भ्रमणलाई कम्युनिस्ट एकता र एमालेको नेतृत्वमा फर्किने सन्दर्भमा जोडेर व्याख्या गर्न नहुने बताए । ‘अहिले त्यो सन्दर्भ भ्रमणसँग जोड्न हुँदैन । त्यसबारेमा पार्टी नेतृत्वले परमार्श पनि गर्छ । तर यो भ्रमण सद्भाव भ्रमण थियो’, उनले भने, ‘६० वटा मुलुक सहभागी सम्मेलनमा नेपालको प्रतिनिधित्व भएको छ । सरकार र पार्टी दुवैको प्रतिनिधित्व भएको छ ।’

उनले नेपालको हितका लागि छिमेकी मुलुक चीनले उच्च सम्मान व्यक्त गरेको पनि बताए । ‘चिनियाँ सरकारको तर्फबाट राम्रो स्वागत मिलेको छ। त्यसक्रममा भएको उच्चस्तरको छलफलमा दुई देशबीचको सम्बन्ध बलियो बनाउने विषयमा कुरा भएको छ’, उनले भने, ‘कांग्रेस र एमाले मिलेर देशको राजनीतिलाई स्थायित्व दिने प्रयास गरेकोमा चीनले खुसी व्यक्त गरेको छ । राजनीतिक स्थायित्वका लागि अहिलेको गठबन्धन ठीक छ भन्ने सन्देश आएको छ।’