काठमाडौं – अर्थमन्त्री विष्णु पौडेलले प्रस्तुत गरेको आर्थिक वर्ष २०८२–०८३ को बजेटमा आर्थिक गौरवका आयोजनाको बजेट रकमान्तर गर्न नपाइने व्यवस्था गरिएको छ ।

बिहीबार सदनमा बजेट प्रस्तुत गर्दै अर्थमन्त्री पौडेलले गौरवका आयोजनाको बजेट रकमान्तर गर्न नपाइने व्यवस्था गरेका हुन् । यस अघि आव २०७९–८० को बजेटमा समेत तत्कालीन अर्थमन्त्री जनार्दन शर्माले यो व्यवस्था गरेका थिए ।

महालेखा परीक्षकको ६१ औं वार्षिक प्रतिवेदनअनुसार आव २०७९–८० मा सरकारले राष्ट्रिय गौरवकै आयोजनाहरूबाट ५ अर्ब ७८ करोड ७५ लाख रुपैयाँ रकमान्तर गरेको थियो ।

सोही आर्थिक वर्षको बजेट वक्तव्यको बुँदा नं ३६९ मा राष्ट्रिय गौरवका आयोजनामा विनियोजित बजेट अन्य राष्ट्रिय गौरवका आयोजना बाहेक अन्यत्र रकमान्तर गर्न नपाइने उल्लेख भए पनि ८ राष्ट्रिय गौरवका आयोजनामा विनियोजित बजेटबाट ५ अर्ब ७८ करोड ७५ लाख रुपैयाँ राष्ट्रिय गौरव बाहेकका अन्य ५१ आयोजनामा रकमान्तर गरिएको थियो ।

यस पटक पुनः अर्थमन्त्री पौडेलले गौरवका आयोजनाको बजेट रकमान्तर गर्न नपाइने व्यवस्था गरिएको घोषणा गरेका छन् ।