काठमाडौं– नेकपा एमालेका महासचिव शंकर पोख्रेल लोकतान्त्रिक गणतन्त्रका कारण जनताको औसत आयु ७२ वर्ष पुगेको बताएका छन् ।

एमालेद्वारा बिहीबार आयोजित गणतन्त्र उत्सवलाई भृकुटीमण्डपमा सम्बोधन गर्दै महासचिव पोख्रेलले पञ्चायतको अन्त्यसम्ममा जनताको औसत आयु ५४ वर्ष रहेकामा गणतन्त्रकै कारण औसत आयु वृद्धि भएको बताए ।

पोख्रेलले पञ्चायतको अन्त्यसम्ममा धनी र गरिबको खाडल २१ गुणा रहेकामा हाल ६ गुणामा सीमित भएको बताए । उनले पञ्चायतको अन्त्यसम्ममा ८ हजार किलोमिटर रहेको मुलुको सडक सञ्जाल १ लाख किलोमिटर भन्दा बढी निर्माण भइसकेको बताए ।

गणतन्त्रपछि केन्द्र सरकारले ४३ हजार किलोमिटर सडक सञ्जाल निर्माण गरेको र प्रदेश सरकारले ६३ हजार किलोमिटर सडक सञ्जाल निर्माण गरेको बताए ।

जनताको बलिदानीपूर्ण संघर्षबाट प्राप्त भएको, जनताको सार्वभौम शक्तिको प्रतीकका रुपमा रहेको गणतन्त्रले नेपाली जनतालाई विकास र समृद्धिको यात्रामा अगाडि बढाउने बताए ।