काठमाडौं– जिल्ला प्रशासन कार्यालय उदयपुरले मदन भण्डारी लोकमार्गका लाइन होटलहरूमा अनुगमन गरेको छ । 

सहायक प्रमुख जिल्ला अधिकारी विक्रम प्रसाद पाण्डेयको नेतृत्वको अनुगमन टोलीले मदन भण्डारी लोकमार्गको बसाहा र बेल्टार खण्डका होटलहरूमा अनुगमन गरेको हो । 

अनुगमनका क्रममा मापदण्ड विपरीत सञ्चालित हलेसी लाइन होटल एण्ड पेडा भण्डारलाई ७ हजार जरिवाना समेत गरेको छ । अनुगमनका क्रममा अखाद्य बस्तु मिसिएको दही, अन्तःशुल्क दर्ता विना बेचबिखन गर्दै गरेका बियर, चुरोट, गुट्खा लगायतका सामाग्री बरामद गरिएको थियो ।

लाइन होटलमा सरसफाइ नहुने, महँगो मूल्य लिने गरेको भन्दै यात्रुहरूको गुनासो आउने गरेपछि प्रशासनले आफ्नो अनुगमनलाई तीव्र पारेको सहायक प्रमुख जिल्ला अधिकारी पाण्डेयले जानकारी दिए ।

अनुगमन टोलीले स्थानीय अधिकारी होटल एण्ड लाज, बबिता खाजा घर, रोडसाइड फाष्टफुड, हलेसी लाइन होटल, काठे घर, बैजनाथ बाबा पेडा भण्डार एण्ड खाजा घर, होटल रोयल एण्ड लाज, पोखरेल होटल लगायतका दश वटा होटलहरुमा अनुगमन गरेको हो ।

अनुगमन टोलीमा खाद्य प्रविधि तथा गुण नियन्त्रण, घरेलु तथा साना उद्योग कार्यालयका कर्मचारीको समेत सहभागिता थियो ।

अनुगमन टोलीले धेरै होटलहरुलाई सरसफाइ र गुणस्तरमा ध्यान पुर्‍याउन निर्देशन समेत दिएको थियो ।