काठमाडौं- नेकपा एमालेनिकट विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)को २४ औँ राष्ट्रिय महाधिवेशन यही जेठ २५ देखि २८ गतेसम्म काठमाडौंमा हुने भएको छ ।

अनेरास्ववियुले जेठ १ देखि ४ गतेसम्म महाधिवेशन गर्ने बताएको थियो । तर तोकिएको समयभन्दा तीन साता ढिलो महाधिवेशन हुने भएको हो ।

बुधबार काठमाडौंको आरआर क्याम्पसमा आयोजित विशेष कार्यक्रममा अनेरास्ववियु इन्चार्ज तथा नेकपा (एमाले) का केन्द्रीय सदस्य किशोरविक्रम मल्लको उपस्थितिमा भएको कार्यक्रमबाट महाधिवेशन तयारी थाल्ने निर्णय गरेको हो ।

महाधिवेशनलाई ऐतिहासिक र स्मरणीय बनाउने लक्ष्यसहित विद्यार्थीहरूको अधिकतम सहभागिता सुनिश्चित गर्न संगठनले देशव्यापी व्यापक जनपरिचालन अभियान सञ्चालन गर्ने भएको प्रवक्ता प्रकाश पौडेलले बताए ।

संगठनले समृद्ध भविष्यको निर्माण र शैक्षिक तथा राष्ट्रिय मुद्दामा अग्रणी भूमिका निर्वाह गर्ने उद्देश्यले महाधिवेशनको तयारी तीव्र गतिमा अगाडि बढाएको पौडेलले जानकारी दिए ।

आरआरमा भएको कार्यक्रमको अध्यक्षता अनेरास्ववियु अध्यक्ष समिक बडालले गरे । कार्यक्रममा जनपरिचालन उपसमिति संयोजक एवम् उपाध्यक्ष धर्म गिरि, उपाध्यक्ष नारायण घर्ती, गोविन्द गिरी, मर्यादा बिस्टलगायत सहभागी थिए । अनेरास्ववियुले महाधिवेशन सफलतापूर्वक सम्पन्न गर्न सम्पूर्ण तयारीमा जोड दिएको पौडेलले बताए ।