काठमाडौं– पूर्वप्रधानमन्त्री डा. बाबुराम भट्टराईको पार्टी नेपाल समाजवादी पार्टी (नेसपा) को रूकुम पूर्व जिल्ला कमिटी नेकपा माओवादी केन्द्रमा समाहित भएको छ । 

‘जनतासँग माओवादी– मध्यपहाडी लोकमार्ग जनजागरण अभियान’ अन्तर्गत बुधबार रूकुम पूर्वको सिस्ने गाउँपालिकामा पर्ने रुकुमकोटमा आयोजित ‘जनसंवाद’ कार्यक्रममा नेसपाको जिल्ला कमिटी माओवादीमा समाहित भएको हो । 

जनमुक्ति सेनाका पूर्व कमान्डर तथा नेसपाका पूर्व केन्द्रीय सदस्य जीतमान पुन ‘मार्सल’ सँगै भट्टराई नेतृत्वको पार्टीको सिंगो कमिटी माओवादीमा समाहित भएको अध्यक्ष पुष्पकमल दाहाल ‘प्रचण्ड’को सचिवालयले दाबी गरेको छ । 

सचिवालयले सत्ताको नेतृत्व गरिरहेको नेकपा एमालेको जन वर्गीय संगठन दलित मोर्चाका जिल्ला अध्यक्ष उपेन्द्रलाल कामी पनि माओवादी केन्द्रमा समाहित भएका जनाएको छ । 

सचिवालयका अनुसार अध्यक्ष प्रचण्डले पार्टीमा प्रवेश गरेका नेताहरूलाई स्वागत गर्दै परिवर्तनको आन्दोलनमा पुनः जुट्न  आग्रह गरेका थिए ।