काठमाडौं– काभ्रेको मण्डनदेउपुर नगरपालिका- १० बाँसटौवामा चट्याङ लागेर कटहरको रूख जलेको भिडियो यति बेला सामाजिक सञ्जालमा भाइरल छ । बिहीबार राति १२ बजे परेको चट्याङका कारण सुकेको कटहरको रूख दनदनी बल्यो । 

पानी परिरहेकै बेला रूख आगोको लप्काले निलेपछि स्थानीले मण्डनदेउपुरका जनप्रतिनिधिलाई खबर गरे । जनप्रतिनिधि मार्फत सशस्त्रको टोलीलाई खबर गरियो । सशस्त्रलाई उक्त खबर शुक्रबार दिउँसो २ बजेपछि मात्रै प्राप्त भयो । चट्याङ लागेर लामो समयदेखि आगो लागेको र जोखिम भएको जानकारी पाएपछि सशस्त्रको टोली आवश्यक सामग्रीसहित टोली घटनास्थलमा पुग्यो । तर फेदबाट टुप्पोसम्म दनदनी बलिरहेको आगो कसरी निभाउने भन्ने अन्योल भयो । 

रूख ढाल्न समय लाग्ने भयो । रूख चढेर आगो निभाउने सम्भावना थिएन । घटनास्थलसम्म दमकल पुर्‍याउने बाटोसमेत थिएन । यता आगोको झिल्का उडेर अन्य मानवीय संरचनामा आगो लाग्ने जोखिम पनि कायमै थियो । सशस्त्र प्रहरीको प्रयासका बावजुत शुक्रवार रुखको आगो नियन्त्रणमा नआएको स्थानीय पत्रकार ज्ञानमणि नेपालले खबरहबलाई जानकारी दिए ।

पत्रकार नेपालका अनुसार शुक्रवार साँझसम्म सशस्त्र प्रहरीले आगो नियन्त्रणमा लिने प्रयास गरेको थियो । सशस्त्रले रूख ढाल्न प्रयास गरे पनि औजारको कमीले रूख ढाल्न नसकिएको पत्रकार नेपाल बताउँछन् । शुक्रवार सशस्त्रले जोखिम रहेका रुखका हाँगा झारेर छाडेको थियो । आगो भने निभेको थिएन । त्यसपश्चात् आज शनिवार बिहान हेर्दा आगो पूर्ण रूपमा निभेको पाइएको उनको भनाई छ । 

राती परेको पानीका कारण  ४० घण्टा देखि दन्किएको आगो नियन्त्रणमा आएको छ र लामो समय आगो बलिरहे पनि कुनै मानवीय र अन्य क्षति भने नभएको पत्रकार नेपालले जानकारी दिए ।