काठमाडौं- काठमाडौं उपत्यका र तराई मधेशका क्षेत्रमा व्यापकमात्रामा हावाहुरी र चट्याङसहितको वर्षाको प्रभाव शुक्रबार साँझ सिंहदरबारमा पनि देखिएको छ ।

बिहीबारदेखि नै बिजुली अनियमित भएको अवस्थामा शुक्रबार सिंहदरबारभित्र पनि बत्ती जाँदा मोबाइल बालेर बैठक गर्नु परेको छ।

देशकै प्रमुख प्रशासनिक केन्द्र सिंहदरबारभित्र संघीय संसद्को शिक्षा उपसमिति बैठक भइरहँदा अचानक बिजुली गयो । त्यसपछि सांसदहरूले बैठक कक्ष उज्यालो बनाउन मोबाइल फोनको लाइटको सहारा लिए ।

बैठकमा राष्ट्रिय स्वतन्त्र पार्टीकी सांसद सुमना श्रेष्ठले मोबाइल बालेर बैठक गरेको तस्बिर सार्वजनिक गरेकी छन् । बिजुली गएपछि समितिको बैठक मोबाइल बालेर नै चलाइएको छ ।

शिक्षा समितिले सांसद छविलाल विश्वकर्माको नेतृत्वमा बनाएको उपसमितिमा शिक्षा विधेयकमाथि छलफल हुँदैछ । एक महिना लामो शिक्षक आन्दोलनपछि सरकारले शिक्षा विधेयकलाई यही बजेट अधिवेशनमा पारित गर्ने बताइसकेको छ।