काठमाडौं- प्रधानमन्त्री केपी शर्मा ओलीले अहिले प्रतिनिधिसभामा सम्बोधन गरिरहेका छन् । प्रतिनिधिसभाको आजको बैठकमा प्रधानमन्त्रीले सरकारको नीति तथा कार्यक्रममाथिको छलफलमा उठेका प्रश्नहरुको जवाफ दिँदै गर्दा प्रमुख प्रतिपक्षी दल नेकपा माओवादी केन्द्रका नेता पुष्पकमल दाहाल प्रचण्ड भने धरानमा छन् ।

सामान्यतया प्रधानमन्त्रीले सम्बोधन गर्दा प्रमुख प्रतिपक्षी दलको नेता प्रतिनिधिसभा बैठकमा उपस्थित हुने परम्परा रहँदै आएको छ । तर, प्रधानमन्त्री ओली र प्रचण्डबीच भने यस अगाडिदेखि नै संसदमा एक अर्काले सम्बोधन गर्दा सदनमा उपस्थित नहुने अवस्था छ ।

प्रचण्ड हिजो पाँचथरमा आयोजित कार्यक्रमलाई सम्बोधन गरेर आज धरान आइपुगेका हुन् । उनी धरानको किराती र लिम्बुवान राष्ट्रिय मुक्ति मोर्चा, नेपालको संयुक्त राष्ट्रिय सम्मेलन उद्घाटन समारोहमा अहिले बोलिरहेका छ्न । प्रचण्डको सचिवालयका अनुसार उनी आजै काठमाडौं फर्केर भोलि पुन सुर्खेत जाँदैछन् ।