काठमाडौं– नेपाली कांग्रेसका सभापति शेरबहादुर देउवाले नेपाल राष्ट्र बैंकको गभर्नर नियुक्तिको विषय चाँडै टुंगिने बताएका छन् ।

बूढानीलकण्ठमा शुक्रबार बसेको पदाधिकारी तथा पूर्वपदाधिकारी बैठकमा सभापति देउवाले राष्ट्र बैंकको गभर्नर चाँडै टुंगिने बताएका हुन् ।

बैठकमा नेताहरूले गभर्नर नियुक्तिको विषयमा चासो राखेपछि सभापति देउवाले जवाफ दिएको प्रवक्ता डा. प्रकाशशरण महतले जानकारी दिए । उनका अनुसार सभापति देउवाले व्यवसायिक व्यक्तिको हातमा राष्ट्र बैंकको नेतृत्व जाओस् भन्ने आफूले चाहेका छन् ।

व्यवसायिक व्यक्तिको हातमा राष्ट्र बैंकको नेतृत्व गए मौद्रिक र वित्त नीतिलाई समन्वयात्मक ढंगबाट अगाडि बढाउन सहज हुने देउवाको आशय थियो । जसका लागि सत्ता साझेदार दल नेकपा एमालेका अध्यक्षसमेत रहेका प्रधनमन्त्री केपी शर्मा ओलीसँगको सहमतिमा निर्णय हुने उनको भनाइ थियो ।

‘राष्ट्र बैंकको गभर्नर नियुक्तिको विषय पनि निकै ढिला भएको छ भन्ने कुरा चासो त्यहाँ प्रकट भयो । सभापतिज्यूले चाडै टुंगिने र राष्ट्र बैंकको नेतृत्व यस्तो व्यवसायिक व्यक्तिको हातमा जानु पर्‍यो । जसले मौद्रिक र वित्त नीतिलाई समन्वयात्मक ढंगबाट अगाडि बढाउन सकोस् । त्यसको अब चाडो निर्णय हुन्छ । एउटा सहमतिबाट निर्णय हुन्छ भन्ने कुरा उहाँले राख्नुभएको छ,’ प्रवक्ता महतले भने ।