काठमाडौं– नेपाली कांग्रेसका पूर्वउपसभापति विमलेन्द्र निधिले प्रवासमा रहेका नेपालीलाई संघीय लोकतान्त्रिक गणतन्त्रात्मक शासन प्रणालीको पक्षमा राजनीतिक रूपले जनमत र समर्थन सिर्जना गर्न आग्रह गरेका छन् । 

जनसम्पर्क समन्वय विभागद्वारा पार्टी केन्द्रीय कार्यालय सानेपामा बिहीबार आयोजित ‘प्रवासमा नेपाली : सरकारको दायित्व र जनसम्पर्क समितिहरूको भूमिका’ विषयक अन्तरक्रिया कार्यक्रमको उद्घाटन समारोहमा उनले यस्तो आग्रह गरेका हुन् । 

‘नेपाली कांग्रेससँग सम्बन्धित सरोकार राख्नेहरूसँग हामी दुई–तीन किसिमको भूमिकाका लागि अनुरोध गर्दछौँ,’ नेता निधिले भने, ‘संघीय लोकतान्त्रिक गणतन्त्रात्मक प्रणालीको पक्षमा राजनीतिक रूपले जनमत र समर्थन सिर्जना गर्नका लागि म अनुरोध गर्न चाहन्छु ।’

उनले नेपालको आर्थिक प्रगतिका लागि प्रवासमा रहेका नेपाली समुदायले आफूले सकेको वैचारिक र आर्थिक योगदान दिनुपर्नेमा पनि जोड दिए । ‘दोस्रो कुरा, नेपालको आर्थिक प्रगतिमा प्रवासमा बस्ने नेपाली दाजुभाइका तर्फबाट वैचारिक अथवा आर्थिक जे योगदान हुन सक्छ त्यस्तो भूमिकाको लागि पनि म अनुरोध गर्न चाहन्छु,’ निधिले भने । 

उनले आगामी निर्वाचनमा कांग्रेसको पक्षमा मतदानका लागि सक्रिय भइदिन पनि आग्रह गरे । ‘२०८४ मा हुने चुनावमा तपाईँहरूको बाहिरबाट र देशभित्रबाट नेपाली कांग्रेसको पक्षमा मतदान कसरी हुने छ, त्यसको लागि पनि सहयोग गर्न सक्रिय भइदिन अनुरोध गर्न चाहन्छु,’ नेता निधिले भने ।