काठमाडौं– नेकपा एकीकृत समाजवादीले संविधान कार्यान्वयनका १० वर्षको पुनरावलोकन गरेर संविधानलाई अझ समृद्ध र जनमुखी बनाउने गरी संशोधन गरिनुपर्ने प्रस्ताव गरेको छ ।

प्रधानमन्त्री केपी शर्मा ओलीलाई बुधबार ज्ञापन पत्र बुझाउँदै प्रतिपक्षी एकीकृत समाजवादीले संविधान कार्यान्वयनको पुनरावलोकन गरेर संशोधनको प्रस्ताव गरेको हो । 

‘शासकीय स्वरूप, संघीयता, निर्वाचन प्रणाली, मौलिक हकको कार्यान्वयनलगायत सबै क्षेत्रमा संविधान कार्यान्वयनका १० वर्षको पुनरावलोकन गरेर संविधानलाई अझ समृद्ध र जनमुखी बनाउने गरी संशोधन गरौँ,’ ज्ञापन पत्रमा भनिएको छ ।   

अहिले संविधान संशोधनको विषय विभिन्न रूपमा उठे पनि विरोधाभाष रहेको एकीकृत समाजवादीले ज्ञापन पत्रमा उल्लेख छ । विरोधाभाषको अवस्थामा संविधान संशोधनको मुद्दा उठाएर जानीजानी मुलुकलाई झन् डर लाग्दो अन्योलतर्फ धकेल्ने प्रयास भइरहेको एकीकृत समाजवादीको ठहर छ । 

‘अहिले संविधान संशोधनको विषय विभिन्न रूपमा उठेको छ । तर, कस्तो विरोधाभाष छ भने हामीले संविधान कार्यान्वयनको पुनरावलोकनसमेत गरेका छैनौँ,’  ज्ञापन पत्रमा लेखिएको छ, ‘यस अवस्थामा संविधान संशोधनको मुद्दा उठाएर या त जानीजानी मुलुकलाई झन् डर लाग्दो अन्योलतर्फ धकेलिँदै छ वा राजनीतिक नेतृत्वका नालायकी लुकाउन खोजिँदै छ ।’