काठमाडौं- यू–१८ साफ च्याम्पियनसिप फुटबल खेल्ने नेपाली टोलीको नेतृत्व जय गुरुङले गर्ने भएका छन् । उपकप्तानको जिम्मा नितिन थापाले पाएका छन् ।

दुवै राम्रा खेलाडी भएपनि प्रशिक्षक टोलीले उनीहरुको क्षमतालाई हेरेर जयलाई कप्तानको जिम्मेवारी दिँदा नितिनलाई उपकप्तान बनाइएको हो ।

प्रतियोगिता शुक्रबारदेखि शुरु हुनेछ । सशस्त्र प्रहरी बलको हल्चोक मैदानमा हुने प्रतियोगिताको पहिलो खेलमा नेपालले माल्दिभ्स विरुद्ध खेल्नेछ ।

यो प्रतियोगिताका लागि मंगलबार मात्रै २३ जनाको टीम घोषणा गरिएको थियो । असोज ३ गतेबाट १२ गतेसम्म हुने खेलमा नेपाल जीतको लक्ष्यसहित मैदानमा उत्रने मुख्य प्रशिक्षक चेतनारायण श्रेष्ठले बताए ।

यस्तो छ नेपाली टोली

नेपाली टोलीमा गोलकिपरमा विशाल सुनार, सूर्य अधिकारी र पुजन होना छन् भने डिफेन्डरमा विशाल बस्नेत, रन्दीप पौडेल, पदम भट्टराई, सुजन शर्मा, नविन गुरुङ, रोशन दोङ, अलिक रुम्बा, अञ्जल महर्जन छन् ।

यस्तै, मिडफिल्डमा सिसिर लेखि, रोसन राना मगर, आकाश बुढामगर, जय गुरुङ, मनिष थापा, कुशल फुयाल, नितिन थापा छन् भने स्टाइकरमा व्रिजेश चौधरी, सन्चु गुरुङ, कैलाश लामिछाने, दर्शन गुरुङ र मनिष डाँगी छन् ।

नेपालको समूहमा माल्दिभ्स, भुटान छन् । नेपाल यस अघिका दुवै संस्करणको च्याम्पियन टिम हो ।