काठमाडौं– नेपाली कांग्रेसका नेता डा. शेखर कोइरालाले काठमाडौंमा जारी नेपाल शिक्षक महासंघको आन्दोलनबारे चासो व्यक्त गरेका छन् । पार्टीको शिक्षा विभागका प्रमुख नैनसिंह महर र नेपाल शिक्षक संघका अध्यक्ष सोमनाथ गिरीलाई फोन गरेर उनले शिक्षक आन्दोलनबारे चासो व्यक्त गरेका हुन् ।
 
कांग्रेसले संसद्को शिक्षा उपसमितिमा छलफलका क्रममा रहेको शिक्षक विधेयकका २८ बुँदामा रहेको असहमति र विधेयकबारे पूर्ण धारणा निर्माणका लागि आवश्यक समन्वय गर्न शिक्षा विभाग प्रमुख महरलाई जिम्मेवारी दिएको छ । 

नेता कोइरालाले सोही विषयमा महरसँग टेलिफोनमा कुराकानी गरेको सचिवालयले जनाएको छ । 

‘डाक्सापले आज (मंगलबार) शिक्षा विभाग प्रमुख र शिक्षक संघका अध्यक्षलाई फोन गरेर शिक्षक आन्दोलन र समाधानका लागि भइरहेको प्रयासबारे जानकारी लिनुभएको छ,’ सचिवालयले भन्यो । 

शिक्षकहरू सडकमा आइसकेपछि साझा धारणा बनाएर समाधान खोज्नु पर्नेमा शिक्षामन्त्री विद्या भट्टराईले राजीनामा दिनुपर्ने अवस्था सिर्जना हुनु दुर्भाग्य भएको कोइरालाको भनाइ छ । उनले शिक्षा विभाग प्रमुख महर र शिक्षक संघका अध्यक्ष गिरीसँग शिक्षक आन्दोलनका कारण विद्यालय सञ्चालन र भविष्यको विषयले आफूलाई चिन्तत बनाएको बताएका थिए । 

सरकारसँग विगतमा भएका सहमति सम्बोधन हुने गरी विद्यालय शिक्षा ऐन जारी गर्नुपर्ने एकसूत्रीय माग अघि सारेर देशभरका शिक्षकहरू सङ्घीय राजधानी काठमाडौंमा आन्दोलन चर्काइरहेका छन् । 

विद्यालय, विद्यार्थी तथा शिक्षक–कर्मचारीमैत्री अग्रगामी विद्यालय शिक्षा ऐन जारी गर्नका लागि सरकारमाथि दबाब सिर्जना गर्न छाता संगठन नेपाल शिक्षक महासङ्घको नेतृत्वमा उनीहरूले आन्दोलन गरेको २१ दिन पुगिसकेको छ ।