काठमाडौं – नेकपा माओवादी केन्द्रका अध्यक्ष तथा पूर्वप्रधानमन्त्री पूष्पकमल दाहाल प्रचण्डले कम्युनिस्ट आन्दोलन टुटफुट, घात प्रतिघात र विभाजनको शृङ्खलाबाट अघि बढेको भन्दै चिन्ता व्यक्त गरेका छन् । उनले सही सङ्गठन र संस्कार, कार्यशैलीको आधारमा कम्युनिस्ट आन्दोलनलाई एकताबद्ध गर्नुपर्ने बताए ।

कम्युनिस्ट पार्टी स्थापना दिवसको अवसरमा मंगलबार आयोजित कार्यक्रमलाई सम्बोधन गर्दै उनले प्रतिक्रियावादी र अवसरवादीहरूले जहिले अपमानित गर्ने, सिद्धियो माओवादी भनेर घोषणा गर्ने गरेको बताए । जनयुद्धको बेलामा पनि त्यस्तै घोषणा गरेपनि जनयुद्ध सफल बनाएर यहाँसम्म आइपुगेको प्रचण्डको दाबी थियो ।

‘अबको समाजवादी क्रान्तिको नेतृत्व गर्ने र त्यसको वैचारिक दृष्टिकोणले सबै सच्चा कम्युनिष्टहरूलाई एकताबद्ध गर्ने जिम्मेवारी काँधमा आएको छ,’ प्रचण्डले भने, ‘माओवादी अरू पार्टीभन्दा फरक छ ।’

उनले अहिले पनि दुई तिहाइभन्दा धेरै जनमत कम्युनिष्टहरूको पक्षमा रहेको दाबी गरे ।