सोल– उत्तर कोरियाली जासुसी ड्रोनको प्रतिकार गर्नका लागि अत्याधुनिक ड्रोन प्रतिरोधी प्रणालीको विकास गर्ने भएको छ ।

दक्षिण कोरियाली रक्षा मन्त्रालयले ८८ अर्ब दक्षिण कोरियाली वन अर्थात् ७ करोड ४० लाख अमेरिकी डलरमा नयाँ ड्रोन प्रतिरोधी प्रणालीको विकास गर्ने जनाएको हो । नयाँ रक्षा प्रणाली सन् २०२३ सम्म विकास गरिसक्ने अन्तर्राष्ट्रिय सञ्चारमाध्यमले जनाएका छन् ।

ब्लोक १ नाम दिइएको नयाँ प्रणालीले आकाशमा उड्ने स–साना ड्रोन र शत्रु विमानको पहिचान गर्ने र आकाशमै नष्ट गर्ने बताइएको छ । यस प्रणालीलाई भविष्यमा परिमार्जन गरी भू उपग्रह र ठूलोस्तरको लडाकु विमानलाई समेत पहिचान र नष्ट गर्ने अपेक्षा गरिएको छ ।

धेरै उत्तर कोरियाली चालकरहित ड्रोनले दक्षिण कोरियाली आकाशको उल्लङ्घन गर्दै आएका छन् । सन् २०१४ मा उत्तर कोरियाली ड्रोनले दक्षिण कोरियाली राष्ट्रपति कार्यालय ब्लू हाउसको तस्वीर खिचेर उत्तर कोरियातर्फ फर्किने क्रममा दुर्घटनाग्रस्त भएको थियो ।

त्यस्तै, सन् २०१७ मा एक उत्तर कोरियाली ड्रोन दक्षिण कोरियाली भूमिमा फेला परेको थियो । उक्त ड्रोनमा दक्षिण कोरियास्थित अमेरिकी क्षेप्यास्त्र प्रतिरोधी प्रणालीका ५ सय ५० भन्दा धेरै तस्वीर खिचिएको फेला परेको थियो ।

सन् १९५० मा शुरु भएको कोरियाली युद्धयता उत्तर र दक्षिण कोरिया युद्धकै अवस्थामा छन् । दुई कोरियाबीच शान्ति वार्ता अघि बढिरहेपनि कोरियाली रक्षा प्रणालीको विकासमा पछिल्लो परियोजना महत्वपूर्ण हुने अपेक्षा गरिएको छ ।