काठमाडौं– पूर्वप्रधानमन्त्री झलनाथ खनालले नेपाल शिक्षक महासंघको आन्दोलनमा ऐक्यवद्धता जनाएका छन् । नेकपा एकीकृत समाजवादीका सम्मानित नेता खनाल बिहीबार आन्दोलनमा सहभागी भएका छन् । 

सरकारसँग विगतमा भएका सहमतिको सम्बोधन हुने गरी विद्यालय शिक्षा ऐन जारी गर्नुपर्ने एकसूत्रीय माग अघि सारेर देशभरका शिक्षकहरू संघीय राजधानी काठमाडौंमा आन्दोलन गरिरहेका छन् । ऐनमा २२ वटा विषयमा सुधार गरिनुपर्ने शिक्षकहरूको माग छ ।

विद्यालय, विद्यार्थी तथा शिक्षक–कर्मचारीमैत्री अग्रगामी विद्यालय शिक्षा ऐन जारी गर्नका लागि सरकारमाथि दबाब सिर्जना गर्न शिक्षकहरु पेशागत छाता संगठन नेपाल शिक्षक महासंघको नेतृत्वमा चैत २० देखि काठमाडौंकेन्द्रित आन्दोलनमा उत्रिएका हुन् । उनीहरूको आन्दोलनको १६ औँ दिनमा पूर्वप्रधानमन्त्री खनाल ऐक्यवद्धता जनाउन आन्दोलनस्थल पुगेका हुन् ।