काठमाडौं– काठमाडौंको भृकुटीमण्डपमा शुक्रबारदेखि शुरु भएको ३ दिने खाद्य मेला आइतबार सम्पन्न भएको छ ।

खाद्य प्रविधि तथा गुण नियन्त्रण विभाग र कृषि तथा पशुपन्छी विकास मन्त्रालयको आयोजना तथा नेपाल खाद्य वैज्ञानिक तथा प्रविधि संघको सहआयोजनामा सम्पन्न मेलामा नेवारी, थारु, तामाङ्ग लगायत विभिन्न जाति, जनजातिका परम्परागत तथा स्थानीय खाना परिकारहरु प्रदर्शनीमा राखिएको थियो ।

मेशिनरी र खाद्य योगशिल परिरक्षी (प्रिजर्भेटिभ) सम्बन्धी व्यावसायिक संस्थाहरु लगायत विभिन्न संघसंस्थाका जानकारीमूलक स्टल, उद्योगहरुबाट उत्पादित खाद्य वस्तु, अचार अल्पप्रचलनमा रहेका खाद्यन्न, बेकरी चिप्स लगायतका गरी कुल ७५ स्टल राखिएका थिए ।

मेलामा पोषण अवस्था, मधुमेह तथा उच्च रक्तचाप समेत पहिचान गरी खानपान तथा परामर्श समेत दिइएको थियो ।

मेलामा खाने बानीमा परिवर्तनका लागि खाद्य स्वच्छता र पोषणसम्बन्धी जनचेतनामुलक कार्यक्रम समेत गरेको आयोजकले जनाएको छ ।

साथमा विभिन्न जाति जनजातिको परम्परागत संस्कृति झल्काउने झाँकी तथा मनोरञ्जनात्मक साँस्कृति कार्यक्रमको व्यवस्था गरिएको थियो ।
स्थानीय उत्पादनको प्रवर्द्धनका लागि भन्दै काठमाडौं लगायत बाहिरी जिल्लामा पनि खाद्य मेला सञ्चालन गर्दै आइरहेको विभागका प्रवक्ता पूर्णचन्द्र वस्तीले बताए । ‘मेलाको अनुभवका आधारमा सर्वसाधरणहरु अत्याधिक मात्रामा लाभान्वित प्रभावकारी भएको पाइन्छ,’ वस्तीले भने ।

मेलामा खाद्य प्रविधि तथा होटल व्यवस्थापन विषय अध्ययन–अध्यापन गराउने विभिन्न शिक्षण संस्थाहरुको समेत सहभागिता रहेको थियो । ३ दिने मेला अवधीभर करिब ७ हजार मानिसले अवलोकन गरेका आयोजकको भनाइ छ ।