धनगढी– धनगढीमा करेन्ट लागेर आमाको मृत्यु भएको छ भने छोरा घाइते छन् । धनगढी उपमहानगरपालिका–१९ को फूलबारीमा अन्दाजी २५ वर्षीया विमला कुँवरको करेन्ट लागेर मृत्यु भएको प्रहरीले जनाएको छ ।

कुँवरलाई मोटरबाट पानी तान्ने क्रममा करेन्ट लागेको थियो । उनलाई उपचारका लागि सेती प्रादेशिक अस्पताल पुर्‍याइए पनि चिकित्सकले मृत घोषणा गरेका हुन् ।

करेन्ट लागेर उनका तीन वर्षीय छोरा प्रजल कुँवर घाइते भएका छन् । उनको सेती प्रादेशिक अस्पतालमा उपचार भइरहेको छ ।

त्यसतै यता कैलालीको गोदावरीमा एक जनाले आफ्नै घरमा आगो लगाएका छन् । गोदावरी नगरपालिका–६ को चौधरी टोल बस्ने २७ वर्षीय अनिलबहादुर चौधरीले शनिबार आफ्नै टिनले छाएको एक तले घरमा आगो लगाएको प्रहरीले जनाएको छ ।

आगलागीबाट घरभित्र रहेका लत्ता कपडा, अन्न जलेर नष्ट भएर साढे २ लाखको क्षति भएको छ । प्रहरीकाअनुसार घरमा आगो लगाउने चौधरीलाई नियन्त्रणमा लिए पनि उनको मानसिक सन्तुलन बिग्रिएको पाइएको छ ।