काठमाडौं – चारदेशिय टी–२० सिरिजअन्तर्गत घरेलु टोली हङकङविरुद्ध नेपालले टस जितेर ब्याटिङको निम्ता दिएको छ ।नेपालले पहिला बलिङ गर्ने भएको छ।

मिसन रोड मैदानमा जारी प्रतियोगितामा अपराजित रहँदै नेपाल फाइनलनजिक पुगको छ । नेपालले यसअघि कतारलाई आठ विकेट र कुवेतलाई ६ विकेटले पराजित गरेको थियो ।

नेपाल लगातार तेस्रो जितसहित फाइनलमा स्थान बनाउने लक्ष्यमा हुनेछ। एक खेलमा हार बेहोरेको हङकङलाई भने नेपालविरुद्धको खेल जित्नैपर्ने दबाब छ।

पहिलो खेलमा हङकङले कुवेतसँग चार विकेटको हार बेहोरेको थियो । तर अर्को खेलमा कतारविरुद्ध ६८ रनको जित निकाल्दै हङकङले प्रतियोगितामा पुनरागमन गरेको छ। कुवेतको पनि समान दुई अङ्क रहेका कारण हङकङलाई नेपालविरुद्धको खेलमा जित निकाल्नुपर्ने छ ।

हङकङ र नेपाल अहिलेसम्म पाँचपल्ट आमुन्नेसामुन्ने भएका छन्। तीमध्ये दुई खेलमा हङकङ र दुई खेलमा नेपाल विजयी भएको छ। एक खेल भने नतिजाविहीन भएको छ।

नेपालले अन्तिमपल्ट २० अप्रिल २०२४ मा ओमानमा आयोजित एसिसी प्रिमियर कपमा हङकङको सामना गरेको थियो। उक्त खेलमा नेपाल चार विकेटले पराजित हुँदा एसिया कपमा स्थान गुमाएको थियो ।