एजेन्सी– इंग्लिस प्रिमियर लिग फुटबल अन्तर्गत गएराति भएको खेलमा आर्सनलले वाट्फोर्डसँग बराबरी खेलेको हो । अग्रता जोगाउन नसक्दा आर्सनल २–२ गोलको बराबरीमा रोकिएको हो।

वाट्फोर्डको मैदानमा भएको खेलमा अग्रता भने आर्सनलले लिएको थियो। आर्सनलले २ गोलको अग्रता जोगाउन नसक्दा अंक बाड्न बाध्य भएको हो ।

आर्सनलका पेरिक एम्रिक आबुमियाङ एक्लैले दुई गोल गरेका थिए। घरेलु टोलीका लागि टम क्लेभर्ली र रोबर्टो पेरेयाराले १–१ गोल गरे। खेलको २१ औं मिनेटमा आबुमियाङले गोल गर्दै आर्सनललाई अग्रता दिलाए। ३२ औं मिनेटमा आबुमियाङले व्यक्तिगत दोस्रो गोल गर्दै आर्सनललाई पहिलो हाफमा २–० को अग्रता दिलाएका थिए।

दोस्रो हाफमा भने आर्सनलले अग्रता जोगाउन सकेन। खेलको ५३ औं मिनेटमा क्लेभर्लीले गोल गर्दै खेल २–१ को स्थितिमा ल्याए । त्यस्तै खेलको ८१ औं मिनेटमा रोबर्टोले पेनाल्टीमा गोल गर्दै खेल २–२ को बराबरीमा ल्याउदै हारबाट जोगाए ।

त्यसपछि कुनै टोलीले गोल गर्न सकेनन् खेल बराबरीमा सकियो । आर्सनल ५ खेलबाट ८ अंक जोड्दै लिगको सातौं स्थानमा छ । वाट्फोर्डको ५ खेलबाट २ अंक छ ।