काठमाडौं– सत्तारुढ दल नेकपाका अध्यक्ष पुष्पकमल दाहाल ‘प्रचण्ड’ ले लामो संघर्षबाट प्राप्त उपलव्धिलाई कलिलो मै मार्न वा निमोठ्न केही तत्व सक्रिय भएको आरोप लगाएका छन् ।

पूर्व माओवादी नेता पोष्टबहादुर बोगटीको स्मृतिमा सोमबार पार्टी कार्यालय धुम्बाराहीमा आयोजित कार्यक्रममा अध्यक्ष प्रचण्डले विरोधीहरु उपलव्धिलाई समाप्त पार्न लागेकाले परिवर्तनको रक्षा र सुदृढ गर्ने संकल्प आवश्यक भएको बताए । त्यसका लागि सबैले आफ्नो स्थानबाट भूमिका खेल्न जरुरी रहेको प्रचण्डको भनाइ थियो ।

‘यो परिवर्तन सात दशक लामो संघर्षबाट प्राप्त भएको छ यो भरखरको बच्चा वा कलिलो जस्तो छ । यसका विरोधीले कलिलो मै यसलाई मार्न र निमोठ्न सकिन्छ कि भनेर लागेका छन्’ प्रचण्डले भने ।

उनले युवा विद्यार्थीले त्यस्ता शक्तिको दुस्साहसको प्रतिवाद गर्नुपर्ने बताए ।

‘युवा विद्यार्थीहरुले केही त्यस्ता अराजक तत्व जसले जनतामा भ्रम सिर्जना गर्न खोजेका छन्, हत्केलाले सूर्य छेक्न खोज्या जस्तो दुस्साहस गरेका छन्,’ प्रचण्डले भने,‘यस्ता तत्वहरुसँग सतर्क रहन र त्यसको प्रतिवाद गर्न विशेष अपिल गर्छु ।’