काठमाडौं– काठमाडौंको जोरपाटीमा रहेको नेपाल मेडिकल कलेजले आन्दोलनरत आवासीय चिकित्सकलाई कारबाही गर्ने चेतावनी दिएको छ । 

मंगलबार कलेजका विभागीय प्रमुख, प्रबन्ध निर्देशक, प्राचार्य तथा अस्पताल निर्देशकसहित बसेको बैठकले सार्वजनिक सुचना जारी गर्दै बिना जानकारी अनुपस्थित रहेका आवासीय चिकित्सकलाई कारबाही गर्ने बताएको हो । 

‘अनुपस्थित रहेका आवासीय चिकित्सकको नाम व्यवस्थापनलाई पठाइदिन अनुरोध छ । उक्त नामावली अस्पताल निर्देशकमार्फत प्राचार्यज्यूलाई आवश्यक कारबाहीका लागि पठाइने छ ।’ कलेज प्रशासनले विभागीय प्रमुखलाई पठाएको पत्रमा भनिएको छ, 

सरकारले निजी मेडिकल कलेजमा चिकित्सा शिक्षा स्नातकोत्तर तह (पीजी) अध्ययन गर्ने आवासीय चिकित्सकलाई मासिक ४८ हजार रुपैयाँ निर्वाह भत्ता दिने निर्णय गरेको थियो । तर २५ माघमा बसेको चिकित्सा शिक्षा आयोगले गरेको सो निर्णय लागू नभएको भन्दै अहिले आवासीय चिकित्सक सडक आन्दोलनमा उत्रिएका छन् ।

हप्ताको १२० घण्टा बढी खट्ने आवासीय चिकित्सकलाई मेडिकल कलेजहरूले २० हजारभन्दा कम निर्वाह भत्ता दिँदै आएका छन् ।