जनकपुरधाम- लोकतान्त्रिक समाजवादी पार्टी (लोसपा) नेपालको मधेस प्रदेश संसदीय दलको नेतामा प्रदेशसभा सदस्य जयनुल राइन चयन भएका छन् । करिब १५ महिनादेखि रिक्त रहेको सो पदमा लोसपाको केन्द्रीय कार्यालयले सोमबार राइनलाई दलको नेता चयन गरेको हो ।

प्रदेशसभा सदस्य अभिराम शर्मा थमन विकको हत्यामा दोषी ठहराएपछि लोसपा संसदीय दलको नेतृत्वको पद खाली भएको थियो ।

शर्मालाई अदालतले दोषी ठहर गरेपछि मधेस प्रदेशसभाले उनलाई निलम्बन गरेको थियो । लामो समयको विवाद र रस्साकस्सीपछि पार्टीका केन्द्रीय अध्यक्ष महन्थ ठाकुरले आज औपचारिक पत्र लेखेर जयनुल राइनलाई जिम्मेवारी दिएका छन् । 

राइनले आफूलाई पार्टी अध्यक्षबाट आजै जिम्मेवारी प्राप्त भएको जानकारी दिएका छन् । राइनले भने, ‘यो पद करिब १५ महिनादेखि रिक्त थियो, आज अध्यक्षज्यूले मलाई जिम्मेवारी दिनुभएको छ ।’

त्यस अनुसार मैले सभामुखको कार्यालयलाई जानकारी गराएको छु ।’ अर्को व्यवस्था नभएसम्म राइनलाई संसदीय दलको नेता मनोनयन गरिएको पत्रमा उल्लेख गरिएको छ ।