काठमाडौं– धरान उपमहानगरपालिकाका मेयर हर्कराज साम्पाङले आफू गणतन्त्रको पक्षमा भएको बताएका छन् । प्रधानमन्त्री केपी शर्मा ओलीलाई भेट्न काठमाडौं आएका साम्पाङले सञ्चार कमीसँग कुरा गर्दै यस्तो बताएका हुन् । 

उनले आफू स्वतन्त्र नागरिकको प्रतिनिधि गर्ने जनप्रतिनिधि भएकाले गणतन्त्रको पक्षमा रहेको तर जनताले गइसकेको व्यवस्था ल्याउन चाहे आफूले केही गर्न नसक्ने बताए । 

उनले विद्युत् प्राधिकरणका प्रबन्ध निर्देशक कुलमान घिसिङको कार्यसम्पादनलाई १ सय नम्बर दिन तयार भएको पनि बताए । उनले सरकारको बारेमा गरेको प्रश्नमा भने बोल्न चाहेनन् । 

‘म गणतन्त्रको पक्षमा छु । तर जनताले रुचाएर राजसंस्था ल्याए भने त भन्नु केही छैन । म गणतन्त्रको पक्षमा भोट हाल्छु  । तर जनताले यो व्यवस्था भन्दा त्यही ठिक छ भनेर ल्याइदिए भने मेरो भन्नु केही छैन । म जनतासँग लड्न सक्दिन । साम्पाङले पत्रकारसँग भने, ‘म अभियान र आन्दोलनबाट आएको मान्छे हो । म बाङ्गै छु । कुलमानलाई म १ सय अङ्क दिन तयार छु । सरकारको विषयमा बोल्दिन ।’