काठमाडौं – अन्तर्राष्ट्रिय बजारमा तेलको मूल्य गिरावट हुँदा रुस सरकार दबाबमा छ । रुसको राजस्वसमेत घटेको मिडिया रिपोर्ट सार्वजनिक भएको छ ।

युक्रेनसँगको युद्ध सुरु भएपछि रुसको अर्थ व्यवस्था मूल रुपमा तेल, उर्जा र खनिज पदार्थको निर्यातमा निर्भर छ । पश्चिमी मुलुकले प्रतिबन्ध लगाए पनि रुसलाई समस्या छैन । तर, ट्रम्पको टेरिफका कारण रुस दबाबमा रहेको मिडिया रिपोर्ट सार्वजनिक भएको छ ।

‘टेरिफ वार’ चलिरहँदा अन्तर्राष्ट्रिय बजारमा तेलको मूल्यमा गिरावट आएको छ । सोमबार तेलको मूल्य घटेर ६० डलर प्रतिब्यारेलमा आइपुगेको छ । यता रुसको ‘युरल्स ओयल’ को मूल्य खस्किएर ५० डलर प्रतिब्यारेलमा झरेको छ ।

दबाबमा रुस सरकार

तेलको मूल्य घटेपछि पुटिन सरकारमाथि आर्थिक दबाब बढेको छ । रुसको अर्थ व्यवस्थामा सबैभन्दा बढी योगदान दिने क्षेत्र तेल र ग्याँस हो ।

यसको बिक्रीबाट रुसले प्राप्त गर्ने राजस्व गत वर्षको मार्चको तुलनामा १७ प्रतिशतले कम भएको मिडिया रिपोर्ट छ ।

अप्रिलमा अमेरिकी राष्ट्रपति डोनाल्ड ट्रम्पले विश्वका अधिकांश मुलुकमा टेरिफ लागु गर्ने निर्णय गरेपछि रुसको राजस्वमा समेत भारी गिरावट भएको अनुमान गरिएको छ ।

रुस सरकार यो विषयलाई लिएर चिन्तित रहेको मिडिया रिपोर्ट छ । रुसी सरकारका प्रवक्ता दिमित्री पेसकोवले वर्तमान परिस्थितिले चिन्ता थपेको बताएका छन् ।

उनले भनेका छन्, ‘निःसन्देह हामी यस विषयलाई लिएर चिन्तित छौं, यो सङ्केत हाम्रो बजेटका लागि प्रभावित पार्ने किसिमको छ, अहिले निकै नै तनावपूर्ण र चिन्ताजनक अवस्था छ, यद्यपि हामी यो परिस्थितिबाट माथि उठ्नका लागि प्रयास गरिरहेका छौं ।’

–एजेन्सी