इजरायल – गाजाको नासेर अस्पताल नजिकै रहेको पत्रकार बसेको पालमा नै इजरायलले आक्रमण गरे पछि एक पत्रकारको ज्यान गएको छ। यसरी ज्यान गुमाउने पत्रकार अहमद मन्सुर हुन्। सोमबार बिहानै भएको आक्रमणमा दुई पत्रकारले ज्यान गुमाएका थिए।

इजरायलले गरेको पछिल्लो आक्रमणमा अहमदसहित ६० जनाले ज्यान गुमाइसकेका छन्। इजरायलले गाजामा आक्रमण गरिरहेकै समयमा प्रधानमन्त्री बेन्जामिन नेतान्याहुले अमेरिकामा राष्ट्रपति डोनाल्ड ट्रम्पसँग वार्ता गरिरहेका थिए।

वार्ताको क्रममा ट्रम्पले गाजा खाली नगराएर इजरायलले छाडेकोमा आश्चर्य व्यक्त गरेको जनाइएको छ। नेतान्याहुले प्यालेस्टाइनीलाई लैजान तयार देशको खोजी भइरहेको बताएका छन्। प्यालेस्टायनी भने अन्य देशमा जान इच्छुक छैनन्। उनीहरू युद्ध पनि चाहँदैनन्।

अहिले गाजामा बढ्दै गएको सङ्कटका कारण संयुक्त राष्ट्र सङ्घ अन्तरगतका ६ निकायले युद्ध विराम आवश्यक भएको बताएका छन्। तथापि इजरायलले युद्ध रोकेको छैन। इजरायली अधीनस्थ पूर्वी जेरुसलेम र वेस्ट बैंकमा समेत इजरायलले गरेको सामूहिक हत्याको विरुद्धमा प्रदर्शन भएका छन्।