काठमाडौं– भारतीय प्रधानमन्त्री नरेन्द्र मोदी सगरमाथा संवादमा नआउने भएका छन् । थाइल्याण्डबाट स्वदेश फर्किने क्रममा प्रधानमन्त्री केपी शर्मा ओलीले भारतीय प्रधानमन्त्री मोदी सगरमाथा संवादमा सहभागी नहुने जानकारी दिएका हुन् ।

त्रिभुवन अन्तर्राष्ट्रिय विमानस्थलमा शनिबार आयोजित पत्रकार सम्मेलनमा ओलीले मोदीको यसअघि नै युरोप भ्रमणको कार्यक्रम तय भइसकेकाले सगरमाथा संवादमा सहभागी हुन नसक्ने बताए ।

‘सगरमाथा संवादमा मोदीजी आउन भ्याउनुहुन्न,’ प्रधानमन्त्री ओलीले भने, ‘यसकारण कि उहाँको पहिले नै त्यसैबेला युरोप जाने कार्यक्रम तय भइसकेको रहेछ ।’

उनले भारतीय प्रधानमन्त्री मोदीसँग आफ्नो अत्यन्तै राम्रो र सुमधुर वातावरणमा हार्दिकताका साथ भेटवार्ता भएको पनि बताए ।

‘मोदीजीसँग भेट भयो । श्रीलंकाका प्रधानमन्त्री, भुटानका प्रधनमन्त्री, म्यानमारका प्रधनमन्त्रीसँग पनि भेट भयो,’ ओलीले भने, ‘खास यहाँहरुको चासो भारतका प्रधनमन्त्रीज्यूसँग भेट कस्तो भयो, के भयो भन्ने कुरा, भेट अत्यन्तै राम्रो, सुमधसुर वातावरणमा मित्रता, हार्दिकताका साथ भेट भयो ।’