काठमाडौं – राष्ट्रिय स्वतन्त्र पार्टी (रास्वपा)का सभपाति रवि लामिछानलेले आफूलाई आतंकित बनाएर घरभित्र प्रहरी छिरेको बताएका छन् ।

शुक्रबार साँझ फेसबुक लाइभमा आएर रविले आफूले गिरफ्तारी दिने तयारी गरिरहँदा पनि प्रहरीले घरभित्रै छिरेर आतंकित बनाएको बताएका हुन् ।

पक्राउ पर्नु अघि लाइभमार्फत उनले भने, ‘मलाई उच्च अदालतले आदेश दिएपछि प्रहरी घरमै आइपुगेको छ । अहिले प्रहरी मेरै बेडरुममा छ। चितवनको कार्यक्रम रोकिँदैन साथीहरूले अगाडि बढाउनुहुनेछ । आम नागरिकले यो सब चिज हेरिरहेका छन् भन्ने लागेको छ। न्यायको लडाई एक थोपा रगत रहन्जेलसम्म पनि लडिरहनेछु। यहाँहरुले पनि साथ दिनुहुनेछ भन्ने विश्वास गरेको छु। मैले कुनै गल्ती गरेको छैन अपराध गरेको छैन। मलाई यिनीहरुले हत्या नै गरेछन् भने पनि नेपाली जनताको मतपत्रमा घन्टी चुनाव चिन्ह बसेको छ । म अदालतलाई सम्मान गर्छु र अदालतको निर्णयलाई मान्छु ।’

प्रहरीले उनलाई घरबाटै पक्राउ गरिसकेको छ । उच्च अदालत तुलसीपुरले थुनामा पठाउने आदेश दिएसँगै उनलाई प्रहरी घरबाटै पक्राउ गरेको हो ।

रास्वपा स्रोतका अनुसार केही साधा पोशाकमा र केही ड्युटीमै खटिएका प्रहरीहरू उनको घर पुगेका थिए । शुक्रबार जिल्ला अदालत रुपन्देहीको आदेश बदर गर्दै उच्च अदालत तुलसीपुरको बुटवलले थुनामा पठाउने आदेश दिएको थियो ।

उच्च अदालत तुलसीपुरको बुटवल इजलासका न्यायाधीश रमेश ढकाल र स्वीकृति पराजुलीको इजलासले रविलाई थुनामा पठाउने आदेश गरेको हो । त्यसलगत्तै उनको निवास बुढानीलकण्ठमा प्रहरीको टोली पुगेको थियो ।