मोरङ– नेपाली कांग्रेसका नेता डा शेखर कोइरालाले अहिलेको संविधान भित्रै रहेर सबै समस्याको समाधान खोज्नुपर्ने बताएका छन् ।

मोरङको वुढिगंगा गाउपालिका–१ मा निर्माण गर्न लागिएको बुढिगंगा पार्कको आज शिलान्यास गर्दै उनले संविधानभित्र रहेर शान्तिपूर्ण आन्दोलन गर्ने अधिकार सबैलाई रहेको चर्चा गरे । कोइरालाले कुनै प्रकारको हिंसा, आतङ्क तोडफोड, आगजनी नेपाली कांग्रेसलाई स्वीकार्य नहुने प्रस्ट पारे । 

नेता कोइरालाले गत शुक्रबार काठमाडौंमा भएको घटनाको निष्पक्ष छानबिन गर्नुपर्नेमा समेत जोड दिए । नेपाली जनतालाई विश्वास दिलाउन छानबिन समिति बनाएर सो घटनाको जति सक्दो चाँडो सरकारले छानबिन गर्नुपर्ने उनको भनाई थियो । 

उनले यो व्यवस्थालाई बलियो र दिगो बनाउन राजनीतिक दलहरू पनि सुध्रनु जरुरी रहेको बताए । उनले अहिलेको अवस्थामा  राजनीतिक दलहरूले आफूलाई सुधार्दै जनताका मन जित्न सक्नुपर्नेमा जोड दिए ।

नेता कोइरालाले नेपाली कांग्रेस र नेकपा एमाले दुई ठुला दल मिलेर सरकार निर्माण गर्दा संविधान संशोधन, सुशासन, आर्थिक विकास, सुशासन तथा रोजगारी सृजना गर्ने  कुरा गरे पनि त्यसो हुन नसेको बताए । जति सक्दो चाँडो आफूले गरेको प्रतिबद्धता पुरा गर्ने तर्फ दलहरूको ध्यान जानुपर्ने कोइरालाको भनाई थियो ।

उनले नेपालमा कृषि, जलविद्युत, जडीबुटी तथा पर्यटनको प्रशस्त सम्भावना रहेकाले त्यसको उचित सदुपयोग गरेर युवाहरूलाई स्वरोजगार बनाउँदै नेपाल नेपाली जनतालाई सुखी र समृद्ध बनाउन सकिने बताए ।