काठमाडौं– राष्ट्रिय प्रजातन्त्र पार्टी संयुक्तले शिवसेना नेपालका अध्यक्षलगायतलाई प्रहरीले पक्राउ गरेको प्रति गम्भीर ध्यानाकर्षण भएको जनाउँदै भर्त्सना गरेको छ ।

इन्द्रजात्राको अवसरमा राष्ट्रपतिलगायतका विशिष्ट पदाधिकारीविरुद्ध प्रर्दशन गर्न लागेका शिवसेनाका अध्यक्ष अनिल बस्नेतसहितका प्रदर्शनकारीलाई प्रहरीले गत शुक्रबार नियन्त्रणमा लिएको थियो ।

राप्रपा संयुक्तले आइतबार प्रेस विज्ञप्ती जारी गर्दै प्रहरी हिरासतमा लिइएका अध्यक्षसहितका व्यक्तिहरुलाई चरम यातना दिइएको उल्लेख गर्दै उक्त घटनाप्रति गम्भीर ध्यानाकर्षण भएको जनाएको छ ।

प्रवक्ता रविन चाम्लिङद्वारा हस्ताक्षरित विज्ञप्तीमार्फत प्रदर्शनमा पक्राउ परेकाहरु सबै जनालाई तत्काल निशर्त रिहा गर्न पनि माग गरिएको छ ।

संविधानद्वारा प्रदत्त नागरिकका मौलिक हक तथा अधिकार प्रयोग एवं उपयोग गर्न निर्वाध, अकुण्ठित वातावरण कायम गर्न, अधिनायकवादी सोच, व्यवहार र प्रवृत्तिको अन्त्य गर्न राप्रपा संयुक्तले सरकारको गम्भीर ध्यानाकर्षण गराएको छ ।