काठमाडौं– नेकपा एकीकृत समाजवादीका अध्यक्ष माधव कुमार नेपालले मुलुकलाई अस्थिर र मुठभेडमा लैजाने गरी अराजक गतिविधि बढेको बताएका छन् । 

मंगलबार विराटनगर विमानस्थलमा सञ्चारकर्मीसँग कुरा गर्दै अध्यक्ष नेपालले मुलुकमा भइरहेको अराजनैतिक गतिविधिमा विदेशीको हात भएको आफूलाई विश्वास नलागेको भन्दै देशी प्रतिगामी तत्त्वहरूले नै मुलुकलाई अस्थिर र मुठभेडमा लैजान खोजेको बताएका हुन् । 

उनले राजतन्त्र आउने सम्भावना नभएपछि चैत्र १५ गतेको आपराधिक घटना गराइएको आरोप लगाउँदै सो घटनाका दोषीहरूलाई सरकारले छिटो कारबाही गर्नुपर्ने जिकिर गरे । उनले नेपालमा रगतको शासन र वंशको शासन आवश्यक नरहेको बताउँदै जनताको चेतनामा विश्वास गर्न आग्रह गरे ।

फरक प्रसङ्गमा अध्यक्ष नेपालले माओवादी केन्द्रले भने जस्तो मुलुकमा प्रत्यक्ष निर्वाचित कार्यकारी राष्ट्रपति वा प्रधानमन्त्री भन्दा पनि अहिले जस्तै संघिय लोकतान्त्रिक संसदीय प्रणाली नै उपयुक्त रहेको जिकिर गरे ।