काठमाडौं– राष्ट्रिय स्वतन्त्र पार्टीका सभापति रवि लामिछानेले सरकारले आफूमाथि षड्यन्त्र गरेको बताएका छन् । सोमबार उनले आफूमाथि भएको षड्यन्त्रबारे चितवनका जनतालाई सम्बोधन गर्ने बताए ।

आजबाट पार्टीको जिम्मेवारीमा फर्किएका सभापति लामिछानेले केन्द्रीय समिति बैठकअघि पत्रकार सम्मेलन गरेर यस्तो बताएका हुन् । उनले सरकाले अझै सक्छ भने आफूलाई थुनेर देखाउन पनि ठाडो चुनौती दिएका छन् ।

‘मलाई थुन, संविधान संशोधन गर्ने भनेर बनेको सरकार ममाथि खनिएको छ । म चितवनका जनतालाई बताउन चाहन्छु । म आउने शनिबार चितवन गएर के षड्यन्त्र भयो सबै चितवनवासीलाई बताउन चाहन्छु । म मेरा चितवनका जनताप्रति ऋणी छु ।’ उनले भने, ‘रवि लामिछाने किस्तीमा आएको प्रधानमन्त्रीको पद त्यागेर हिँडेको हो । यिनीहरूका अगाडि शिर झुकाउने काम गरिनँ । के नियतले मलाई राति उठाइयो सबैतिर छ्याङ्ग छ ।’

उनले शनिबारको चितवन भेलामा आफ्ना बाँकी कुरा बताउने उल्लेख गरे ।

सहकारी ठगी प्रकरणमा लामिछानेको सांसद पद अहिले पनि निलम्बनमा छ । उनको अदालतमा मुद्दा विचाराधीन भए पनि पार्टीको जिम्मेवारीमा फर्कन लागेका हुन् ।