एजेन्सी– साउदी अरबले दुईवटा प्रमुख तेल प्रशोधन केन्द्रमा ड्रोन आक्रमण भएपछि तेल र ग्यास उत्पादनमा कटौती गरेको छ ।

ऊर्जामन्त्री राजकुमार अब्दुल अजिज बिन सलमानका अनुसार आक्रमणका कारण कच्चा तेल उत्पादनमा प्रतिदिन ५७ लाख ब्यारेल कमी आएको छ । साउदी अधिराज्यले कुल उत्पादन गर्ने परिमाणको झन्डै आधा हो ।

यमनस्थित हूथी विद्रोहीका एक प्रवक्ताले आक्रमणका लागि आफूहरूले १० वटा ड्रोन परिचालन गरेको बताएको बीबीसीले जनाएको छ ।

साउदी प्रेस एजेन्सीले छापेको राजकुमार अब्दुल अजिज बिन सलमानको वक्तव्यमा उनले “ड्रोन आक्रमणका कारण अब्काइक र खुरैस प्रशोधन केन्द्रमा तत्कालका लागि उत्पादन रोकिएको” बताएका छन् ।

अरामको भण्डार केन्द्रका प्रमुख कार्यकारी अधिकृतले दुवै प्रशोधन केन्द्रमा स्थिति नियन्त्रणभित्र रहेको बताउँदै आक्रमणबाट कोही हताहत नभएको बताएका छन् ।

अमेरिकी विदेशमन्त्री पोम्पेओले आक्रमणलाई “विश्वको ऊर्जा आपूर्तिमाथिको अभूतपूर्व आक्रमण” को सङ्ज्ञा दिएका छन् । उनले भनेका छन् “इरानी आक्रमणको सार्वजनिक र स्पष्ट रूपमा निन्दा गर्न हामी सबै मुलुकलाई आग्रह गर्छौँ।”

बेरुतस्थित हुथी स्वामित्वको अल-मसिराह टीभीसँग कुरा गर्दै हुथी विद्रोहीका प्रवक्ता याह्या सरिआले भविष्यमा थप आक्रमण गर्न सकिने बताएको बीबीसीले जनाएको छ ।

साउदी अरबको सबैभन्दा ठूलो तेल प्रशोधन केन्द्र अराकोको अब्काइकमा ठूलो आगलागी भएको टेलिभिजनमा प्रसारित दृश्यमा देखिएको थियो । अरामको विश्वको सबैभन्दा ठूलो तेल उत्पादक मात्रै नभई विश्वमै सबैभन्दा बढी नाफा कमाउने कम्पनी हो ।

साउदीले तेल उत्पादन कटौती गरेसँगै विश्वबजारमा तेलको मूल्य बढ्न सक्ने आश‌ंका उत्पन्न भएको अन्तर्राष्ट्रीय सञ्चारमाध्यमहरुले जनाएका छन् ।