काठमाडौं– नेकपा माओवादी केन्द्रका सांसद माधव सापकोटाले सत्तापक्ष सांसदहरू भौतिक रूपमा नै हमला गर्नेगरी सदनमा प्रस्तुत भएको आरोप लगाएका छन् ।  

आइतबार संसद् भवन बानेश्वरमा सञ्चारकर्मीसँग कुरा गर्दै सापकोटाले संसदमा विपक्षी सांसद भन्दा उग्र भएर सत्तापक्ष सांसदहरूले भौतिक रूपमा नै हमला गर्ने क्रियाकलाप गरेको आरोप लगाएका हुन्  । उनले सत्तापक्ष र प्रधानमन्त्री सदनप्रति गैर जिम्मेवार देखिएको  र जटिलता थपिँदै गएको बताए  । 

सापकोटाले देशमा देखिएको पछिल्लो घटनाका साथै आफूहरूले उठाएका मागमा गम्भीर भएर प्रधानमन्त्रीले सदनमा जवाफ दिनुपर्नेमा प्रधानमन्त्री अलमलिएर बसेको जिकिर गरे ।  

उनले सदनलाई जबरजस्ती पेलेरै अघि बढाउने तयारी भएको र नियोजित रूपमा प्रतिनिधिसभाको प्रत्यक्ष प्रसारण रोकिएको आरोप लगाए । प्रधानमन्त्रीले सदनमा जवाफ नदिएसम्म आफूहरूको विरोध कायमै रहने उनको भनाइ छ ।