काठमाडौं- अमेरिकाले देशनिकाला गरेर पठाएका तीनजना भुटानी शरणार्थी झापाबाट शनिबार दिउँसो समातिएका छन् ।

दमक नगरपालिका–३ स्थित बेलडाँगी शरणार्थी शिविरमा बस्दै आएका ३६ वर्षीय आशिष सुवेदी, ३१ वर्षीय सन्तोष दर्जी र ३६ वर्षीय रोशन तामाङलाई पक्राउ गरिएको जिल्ला प्रहरी कार्यालय झापाका डीएसपी खगेन्द्र खड्काले जाकारी दिएका छन् ।

उनीहरूलाई तीनैजनालाई अमेरिका देश निकाला गरेर भुटान फर्काएको थियो। तर तीनैजना भुटान नफर्की नेपाल छिरेर शरणार्थी शिविरमा बसिरहेका थिए ।

तीनैजना झापास्थित पूर्वीनाकाबाट नेपाल छिरेको अनुमान प्रहरीले गरेको छ । अमेरिकाले डिपोर्ट गरेर पठाएका भुटानीहरू अहिले विभिन्न देशबाट भारत हुँदै नेपाल छिरिरहेका छन् ।

अमेरिकाबाट फर्किएर भारतमा बसिरहेका भुटानीहरू नेपाल छिर्न थालेको सूचना प्रहरीलाई आएको थियो । प्रहरीले शनिबार समातेका तीनै भुटानी शरणार्थीलाई अध्यागमन कार्यालय काँकडभिट्टामा पठाएको छ।

अमेरिकाबाट फर्काइएका भुटानी शरणार्थीलाई भारतले शरण दिन मानेको छैन । त्यहीकारण उनीहरू नेपाल छिर्न थालेका हुन् ।