काठमाडौं – संघीय लोकतान्त्रिक गणतन्त्र कुनैपनि प्रतिगामी शक्तिको षडयन्त्रबाट नढल्ने संयुक्त राजनीतिक दलित संघर्ष समितिले जनाएको छ ।

समितिको तर्फबाट आज प्रेस विज्ञप्ति जारी गर्दै दलितलगायत आम उत्पीडित, वर्ग, क्षेत्र र समुदायका आधारभूत मुद्दालाई सम्बोधन गर्दै लोकतान्त्रिक प्रणालीलाई अझै समृद्ध गर्न, कमिकमजोरी सच्याउन र खबरदारी गर्दै समितिले सङ्घीय लोकतान्त्रिक गणतन्त्र कुनैपनि प्रतिगामी शक्तिको षड्यन्त्रबाट नढल्ने बताएका हुन् ।

समितिले मुलुकमा केही समयदेखि देखिएका अराजक र प्रतिगामी हर्कतहरूप्रति हामी संयुक्त राजनीतिक दलित सङ्घर्ष समितिको गम्भीर ध्यानाकर्षण भएको जनाउँदै चैत्र १५ गते काठमाडौंको तीनकुने, कोेटेश्वर र जडिबुटी लगायतका क्षेत्रमा आफूलाई पूर्वराजा ज्ञानेन्द्र शाहको समूह दाबी गर्ने अराजकतावादी दुर्गा प्रसाई र रविन्द्र मिश्रहरूको नेतृत्वको झुण्डले देखाएको उद्दण्डता र हिंसाको हामी घोर निन्दा र भर्तस्ना गरेको छ ।

‘विभिन्न राजनीतिक पार्टीका कार्यालय, सार्वजनिक सम्पत्ति, सवारी साधन, सञ्चारगृहमाथि तोडफोड एवम् सुपरमार्केटमा लुटपाट मच्चाएर समाजलाई आतङ्क सिर्जना गरेकोमा हामीलाई आक्रोशित बनाएको छ । यो उच्छृङ्खल र अराजक कार्यको हामी घोर भत्र्सना गर्दछौं । यस कार्यमा संलग्न अपराधिक तथा आततायी तत्वहरूलाई यथासिघ्र कानुनी दायरामा ल्याई कडाभन्दा कडा कारवाही गर्न र यस्ता गतिविधिहरुमाथि पूर्ण नियन्त्रणका लागि कडा कदम चाल्न सरकारसँग जोडदार माग गर्दछौं’, संयुक्त विज्ञप्तिमा भनिएको छ ।