काठमाडौं– राजावादीको आन्दोलन हिंसात्मक भएको र सो आन्दोलनमा एक जनाले ज्यान गुमाएको गृह मन्त्रालयले जनाएको छ । अहिले साँझ पत्रकार सम्मेलन गर्दै गृह मन्त्रालयका सहसचिव छवि रिजालले सो बताएका हुन् ।

‘पूर्व राजाका समर्थकद्वारा तीनकुने क्षेत्रमा जुन गतिविधि गरियो त्यो खेदजनक छ, सभ्य समाजले हेर्दा लाज लाग्ने आन्दोलन हामीले देख्यौँ’, उनले भने, ‘सुरक्षाकर्मीलाई नै मार्ने नियतले जब उहाँले सवारी साधन चलाउनुभयो त्यहाँबाट नै आन्दोलन त्यो रूप लिएको छ ।’

उनले आज भएको आन्दोलनमा कीर्तिपुरका २९ वर्षीय सबिन महर्जनको मृत्यु भएकोसमेत बताए । उनले सरकारले अनुमान गरेको भन्दा आन्दोलन फरक हुन पुगेको समेत बताए । साथै अराजक गतिविधि गर्नेमाथि सूक्ष्म निगरानी गरिरहेको समेत उनको भनाइ छ ।

‘राज्यको निकायले यसलाई निकै सूक्ष्म रूपमा निगरानी गरेको छ, हामीले सबैलाई कानुनी कारबाहीमा ल्याउँछौँ’, उनले भने, ‘आजको आन्दोलनमा जे जति क्षति भएको छ, त्यसको जिम्मेवारी दुर्गा प्रसाईँ र आयोजकले लिनुपर्छ ।’