काठमाडौं– प्रतिनिधि सभाका सभामुख देवराज घिमिरे प्रमुख दलका प्रमुख सचेतकहरूसँग छलफल गरिरहेका छन् । 

प्रतिनिधिसभामा विपक्षी दलहरूले गरेको अवरोध खुलाउने विषयमा उनी प्रमुख दलका प्रमुख सचेतकहरूसँग छलफलमा जुटेका हुन् ।

सभामुख घिमिरे अहिले नयाँ बानेश्वरस्थित संघीय संसद् भवनमा प्रमुख राजनीतिक दलका प्रमुख सचेतकहरूसँग छलफलमा रहेका उनको सचिवालयले जनाएको छ । 

सचिवालयले अहिलेसम्म प्रधानमन्त्री केपी शर्मा ओलीले संसद्मा आएर विपक्षीले माग गरेबमोजिम जवाफ दिने सूचना नरहेको पनि जनाएको छ । 

प्रतिपक्षी दलहरूले नेपाल विद्युत् प्राधिकरणका प्रबन्ध निर्देशक कुलमान घिसिङलाई बर्खास्त गरिनुको कारणबारे प्रधानमन्त्रीले जवाफ दिनुपर्ने भन्दै बुधबारको बैठक अवरुद्ध गरेका थिए । 

बैठक सुचारु हुन नसकेपछि सभामुख घिमिरेले बिहीबार बिहान ११ बजेका लागि संसद् बैठक बोलाएका थिए ।