काठमाडौं– कुलमान घिसिङको बर्खास्तीबारे ऊर्जा, जलस्रोत तथा सिँचाइमन्त्री दीपक खड्काले प्रतिनिधिसभामा बिहीबार जवाफ दिने भएका छन् ।  

बुधबार प्रतिनिधिसभामा विपक्षी दल नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, नेकपा एकीकृत समाजवादीले नेपाल विद्युत् प्राधिकरणका प्रबन्ध निर्देशक घिसिङ हटाएको विषयमा प्रधानमन्त्रीको जवाफ माग गरेका थिए । 

विपक्षीले सदनमा जवाफ माग गरेर सदन अवरोध गरेपछि बुधबारको बैठक बिहीबारका लागि सभामुख देवराज घिमिरेले सारेका छन् ।

बिहान ११ बजे सुरु भएको बैठक आधा घण्टा अवरोध भएपछि ३ बजे पुनः बसेको थियो । तर विपक्षीले प्रधानमन्त्री को जवाफबारे अडान नछोडेपछि बैठक सारिएको थियो । 

भोलिको बैठक ११ बजे बस्ने छ । जहाँ विभागीय मन्त्री खड्काले कुलमानलाई बर्खास्त गरेको विषयमा सदनमा जवाफ दिने सहमति भएको नेकपा एमालेका प्रमुख सचेतक महेश बर्तौलाले खबरहबलाई बताए । 

‘यो प्रधानमन्त्रीले जवाफ दिने कुरा नै होइन । यस्ता साना कुरामा प्रधानमन्त्रीले जवाफ दिन थालेपछि समस्या हुन्छ ।’ बर्तौलाले खबरहबलाई भने, ‘सरकारका तर्फबाट मन्त्रीले जवाफ दिनुहुन्छ । यसका विभागीय मन्त्रीले नै दिने छलफल भएको छ ।’ 

उनले सरकारले नियुक्ति गरेको कर्मचारी हटाउँदा सडक र सरकारमा रोइलो गर्नु उचित नभएको तर्क गर्छन्  । 

तर विपक्षीले भने प्रधानमन्त्री ओलीकै जवाफ माग गरेका छन् । उनीहरूले ओलीले जवाफ नदिए सदन नचल्ने अडान कायम राखेका छन् ।