एजेन्सी – बोआओ फोरमले मंगलबार जारी गरेको प्रतिवेदनमा सन् २०२५ मा एसियाको वास्तविक कुल गार्हस्थ्य उत्पादन (जीडीपी वृद्धिदर) चार दशमलव पाँच प्रतिशत पुग्ने अनुमान गरिएको छ।

प्रतिवेदनअनुसार सन् २०२४ मा यस क्षेत्रको जीडीपी चार दशमलव चार प्रतिशतले वृद्धि भएको थियो । बढ्दो विश्वव्यापी आर्थिक अनिश्चितताका बावजुद एसिया विश्व अर्थतन्त्रका लागि प्रमुख वृद्धिको इञ्जिनका रूपमा रहेको प्रतिवेदनमा उल्लेख छ ।

‘एसियन इकोनमिक आउटलुक एन्ड इन्टिग्रेसन प्रोग्रेस’ प्रतिवेदनमा सन् २०२४ मा जीडीपीको अनुपात र क्रय शक्ति समानतामा विश्वको कुल जीडीपीमा एसियाको जिडिपी ४८ दशमलव एक प्रतिशतबाट बढेर सन् २०२५ मा ४८ दशमलव छ प्रतिशत पुग्ने अनुमान गरिएको छ ।

यसैगरी एसियामा सन् २०२५ मा बेरोजगारीदर चार दशमलव ३९ प्रतिशत हुने अनुमान छ । यो विश्वव्यापी बेरोजगारीदर चार दशमलव ९६ प्रतिशतभन्दा कम हो ।