पोखरा– सशस्त्र प्रहरीको हुल तथा दंगा व्यवस्थापन तालिम शिक्षालय, लामापाटन पोखरामा कार्यरत सशस्त्र प्रहरी निरीक्षक सन्तोषी महतको मृत्यु प्रकरणमा सशस्त्र प्रहरीकै दुई जना पुर्पक्षका लागि थुनामा परेका छन् । आत्महत्या दुरुत्साहनको आरोपमा सशस्त्र प्रहरी निरीक्षक विवेक जोशी र हबल्दार रेशमबहादुर शाहीलाई थुनामा पठाइएको हो ।

कास्की जिल्ला अदालतका न्यायाधीश भोलानाथ ढकालको इजलासले सोमबार उक्त आदेश जारी गरेको हो । महत गत फागुन १० गते राति तालिम शिक्षालयको परिसरमा झुण्डिएको अवस्थामा फेला परेकी थिइन् । उनको मृत्यु शंकास्पद रहेको भन्दै परिवारले फागुन ११ गते नै जिल्ला प्रहरी कार्यालय, कास्कीमा किटानी जाहेरी दिएका थिए । जाहेरीपछि निरीक्षक जोशी पक्राउ परेका थिए भने अनुसन्धानकै क्रममा चैत ६ गते हबल्दार शाहीलाई पनि नियन्त्रणमा लिइएको थियो ।

महत र जोशीबीच प्रेम सम्बन्ध रहेको कुरा परिवारले जनाएको छ । घटनाबारे अनुसन्धान सकेर प्रहरीले चैत ८ गते जिल्ला सरकारी वकिलको कार्यालय, कास्कीमा प्रतिवेदन बुझाएको थियो । सरकारी वकिलको कार्यालयले मुलुकी अपराध संहिताको दफा १८५ बमोजिम मागदाबी गर्दै चैत ९ गते अदालतमा अभियोगपत्र दर्ता गराएको थियो । सोही आधारमा सोमबार अदालतले उनीहरूलाई पुर्पक्षका लागि थुनामा पठाउने आदेश दिएको हो ।

मुलुकी अपराध संहिताअनुसार आत्महत्या गर्न दुरुत्साहन दिने कार्यमा संलग्न व्यक्तिलाई ५ वर्षसम्म कैद र ५० हजार रुपैयाँसम्म जरिवाना हुने कानुनी व्यवस्था छ ।

यस घटनाको अनुसन्धानका लागि सशस्त्र प्रहरी बल प्रधान कार्यालयले डीआईजी लक्ष्मण सिंहको नेतृत्वमा विशेष छानबिन समिति गठन गरेको छ । महतले २०७२ सालमा सशस्त्र प्रहरी सेवामा सिपाहीका रूपमा प्रवेश गरेकी थिइन् । २०७८ मा असईमा पदोन्नति भएकी महतले यही वर्ष निरीक्षक पदमा उतिर्ण भई पोखरामा तालिम गरिरहेकी थिइन् ।